DNA-rannsókn

Það er alltaf gaman þegar kristnir menn eltast við alls kyns vitleysu sem á að tengjast Jesú. Að þessu sinni eru það bein frelsarans sem eiga að vera fundin, en slíkir fundir eru gjarnan notaðir sem rök fyrir trúnni allri, eða biblíunni allri. 

 

Lang flestir trúa því að Jesú hafi lifað, en það er víst ekki nóg að hafa lifað til að vera messías.

Síðasta efnisgrein fréttarinnar er sérlega skemmtileg. Ef það er virkilega rétt að kvikmyndagerðarmennirnir séu að nota vísbendingar úr DNA prófum til að styðja mál sitt, þá er þetta auðvitað góð og gild spurning. Á að bera erfðaefni Jesú við erfðaefni Guðs? En er ekki yfirleitt nóg að taka blóðprufu þegar leysa þarf faðernisdeilur? 

Sérfræðingur segir fullyrðingar um Jesú í nýrri heimildarmynd tómt bull

Læknafélagið stendur sig vel

Tryggingafélög hljóta að þurfa að taka áhættu þegar þeir selja tryggingar. Annars eru þau bara að taka peninga fyrir ekki neitt. Tryggingafélögin fara kannski að bjóða sjóslysatryggingar til fólks sem er rúmfast og bílatryggingar til blindra o.s.frv. Áhættan engin og Finnur Ingólfsson getur safnað arði á efstu hæðinni í Ármúlanum.

 Læknafélagið kemur með þarfar ábendingar og ef þetta verður samþykkt held ég að við ættum frekar að safna peningum undir kodda en að tryggja okkur.

Læknafélagið: Reynt að skipta þjóðinni upp í hreinan kynstofn og hina

Til hamingju!

Þriðja ríkið er fallið. Sumir telja það reyndar hafa gerst 1945, en þetta er a.m.k. þriðja ríki BNA sem leyfir samkynhneigðum að staðfesta samvistir.

New Jersey þriðja bandaríska ríkið sem leyfir samkynhneigðum að staðfesta samvist sína

Pfizer setur herferð í gang

Ert þú hræddur um að börnin verði hálfvitar. Finnst þér ekki leiðinlegt að þurfa að hafa samviskubit þegar þú horfir á sama þáttinn tvisvar? Eru þínar bestu stundir fyrir framan sjónvarpið með fötu af KFC? Fáðu þér þá melatónín. Nú í formi kóladrykkjar!!! Melanfjórir í dós eða 2 l. flösku fyrir alla fjölskylduna. Melatónín, Melatónín, Melatónín!!!

(Melatónín kann að valda hjartasjúkdómum og heilaskemmdum í börnum og fullorðnum)

 

Ég hlakka mikið til að sjá þessa auglýsingu í sjónvarpinu. 

Mikið sjónvarpsgláp enn skaðlegra en áður var talið fyrir börn

JP alltaf í vandræðum

Ég get ekki annað en bent á stórgott aukablað, sem kom út í dag og á vel við þessa frétt.

Duftbréf barst til Jyllands-Posten

Atvinnutækifæri

Stríð og dauði hafa ævinlega skapað mikla atvinnu. Að þessu sinni verða það atvinnulausir sálfræðingar í Danmörku (en nóg er víst af þeim) sem fá að njóta tímabundinnar vinnu þegar shell-sjokkuðu hermennirnir fara að streyma inn á ríkisstofnanir.

Sjálfur hefði ég nú fremur valið að vera með atvinnulausa sállfræðinga en andleg úrhrök úr hernum. En maður fær víst ekki allt sem maður vill. Ætli afstaða sálfræðinga til stríðsins í írak, og þátttöku Dana í því, hafi breyst eftir fréttirnar? 

Danskir hermenn sækjast í auknu mæli eftir sálfræðiaðstoð

Kirkjan hafði það rétt

Mér þykir ágætt að sjá að í yfirlýsingu kirkjunnar virðist ekki vera kallað eftir banni á klámhundana. Kirkjan harmar að þeir séu að koma. Ég harma það líka. Mér finnst ekki ástæða til að fagna nýjum súlustað eða kynningu á klámtökustöðum á Íslandi.

Mér dytti þó aldrei í hug að vilja banna fólki að koma. Undanfarna daga hafa femínistar þurft að standa í miklu karpi við aðdáendur kláms og aðdáendur mannlegs frjálsræðis. Því miður hefur þetta karp skarast töluvert og oft er erfitt að sjá hvar klámaðdáandinn byrjar og frjálsráðurinn endar.

Ég myndi falla í seinni kategóríuna. Ég hvet þá sem móðgast yfir kláminu, eða hafa siðferðalegar athugasemdir við klámefni, til að mæta með skilti, vekja athygli á skuggahliðum kláms o.s.frv. í þessari bylgju sem nú ríður yfir.

Mér þykir þó fráleitt að reyna að banna liðinu að koma, enda fátt sem bendir til þess að nokkuð ólöglegt standi til. Mér fannst sorglegt að sjá þegar einn femínistinn stakk upp á því að stjórnvöld stöðvuðu komu þessa fólks, enda hefðu þau gert slíkt áður, s.s. falun gong, mótorhjólagengi o.þ.h. Þetta voru aðgerðir sem allir ættu að fordæma. Aðgerðirnar voru öllum til minnkunnar og amatöralegar í besta falli. Stjórnvaldið var einfaldlega hrætt og vissi ekki hvað það átti að gera annað.

Slíkar aðgerðir ætti enginn að vilja. Ég er nokkuð viss um að þessi sami femínisti hafi verið ósáttur við framkomuna gegn falun gong, en nú, þegar það hentar hennar málstað, á að fara að merkja hópa og banna þeim að koma. Skammastu þín! 

Hörð mótmæli vegna klámþings

Langar einhvern að vita meira?

Rosalega langar mig að vita hvers vegna einhver kastar syni sínum á lestarteina og stekkur svo sjálfur niður á þá og drepst. Þetta er afar undarleg og ófullnægjandi frétt...

Varpaði sér og syni sínum á lestarteina

Hvernig heila ertu með?

Ég rakst á afar heimskulegt próf á bbc.co.uk, en það á að skera úr um hvers konar heila próftakinn er með. Prófið byggist á ýmsum misheimskulegum kenningum og karl- og kvenheilann, og látið er eins og þetta séu tveir ólíkir hlutir. 

Prófið er í 6 hlutum og allra heimskulegasti hlutinn mælir getur fólks til að greina svipbrigði. Þetta væri ekki svo heimskulegt ef raunin væri sú að karlmenn og konur ættu miserfitt með að greina svipbrigði, en þegar prófinu er lokið kemur í ljós að meðaltal karla og kvenna á þessu prófi er hið sama. Þannig hefur prófhlutinn ekkert aðgreiningarhlutverk og hlýtur að teljast irrelevant.

Þá var mér bent á í prófinu að ég væri með ráðandi vinstra heilahvel (left hemisphere dominant). Þetta var auðvitað mikið sjokk, ekki síst vegna þess að um 90% fólks er einmitt þannig. Ekki man ég eftir því að þessi munur hafi verið breytilegur á milli kynja (en ég skrifaði eitt sinn ritgerð um ráðandi heilahvel og örvhendu). Þannig sé ég ekki að þessi prófþáttur sé aðgreinandi frekar en sá sem ég nefndi á undan.

 Þá er einn prófhluti þannig að mæla á vísi- og baugfingur beggja handa. Þarna er vísað í einhverja vafasama testósterón kenningu þar sem baugfingurinn á að vera stærri eftir því sem fólk hefur orðið fyrir meira testósteróni í móðurkviði. Ef þessi undarlega kenning stenst er ég uppfullur af karlmennsku, en hlutfallið hjá mér var baugfingur/vísifingur=0,91 á meðan meðal karlmaðurinn er með 0,96 og konur með 1.00. Þessi prófþáttur verður þó að teljast afar vafasamur, ekki síst ef tekið er tillit til þess að ég geng í buxum úr kvennadeildinni í Söru og er reglulega spurður hvort ég sé hommi á djamminu. 

Það vill svo til að ég stóð mig frábærlega á þessu prófi. Var yfir meðaltali í öllum prófhlutum og má þá helst nefna frábæran árangur í sjónminnis- og hugarsnúningsverkefnum. 

Þessi frábæri árangur minn gerði það að verkum að ég er með 0% heila. Það þýðir reyndar ekki að ég sé heilalaus, heldur er mér sagt að heilinn í mér sæki hvorki í karllæga né kvenlæga átt.  

 Þetta var prófgagnrýni dagsins. Prófið prófið sjálf.

Klámið burt!

Ég er einn af þeim fjölmörgu notendum firefox sem hef nælt mér í flash-block viðbótina. Þessi viðbót losar mann við allt óumbeðið flash og setur þess í stað lítið f (fyrir flash) í staðin. Mér þótti hugmyndin strax sniðug en gerði mér ekki grein fyrir því hversu gaman er að losan við allt óumbeðna klámið sem auglýst er á alls kyns vefsíðum (ótengdum klámi og erótík). 

Mér fannst þessar auglýsingar svo sem lítið mál, vegna þess að ég var hættur að sjá þær. En nú þegar þær eru hættar að sjást finn ég til mikil léttis. Ég sé bara öll f-in mín og hugsa stoltur: þarna lék ég á þá.

 Prófið þið flash-block!